person_outline

Loyiha haqida


Savodxon

Oʻzbek tili imlo dasturi loyihasi (v. 5.0)

Savodxon dasturi oʻzbek tili imlo qoidalarini ommalashtirish va savodxonlikni targʻib qilish uchun ishlab chiqilgan dasturiy vositadir. Uning yordamida siz matndagi imlo xatolarni aniqlashingiz va kontentingiz sifatini oshirishingiz mumkin.

Savodxon dasturi asos va qoʻshimchalar bazasidan foydalangan holda tekshirish uchun yuborilgan matnni tahlil qiladi va undagi xato yozilgan soʻzlarni ajratib beradi.

Loyiha maqsadi

Dastur bugungi kunning eng dolzarb muammolaridan biri — imloviy savodsizlikni bartaraf etish uchun ishlab chiqilgan. Loyiha mualliflari internet tarmogʻi va bosma nashrlardagi matn sifatini oshiribgina ommaviy savodxonlikka erishish mumkinligiga ishonadilar.

Loyiha tarixi

Mana yildirki, savodxon dasturi tinimsiz rivojlanib, oʻsib bormoqda. Sayt 2014-yilda ijtimoiy loyiha sifatida oʻz ishini boshlagan boʻlsa, yildan-yilga uning imkoniyatlari va ishlash sifati oshib bordi. Quyida dastur taraqqiyotidagi muhim sanalar keltirilgan:

2020-yil, 17-iyul — Android tizimida ishlaydigan qurilmalar uchun bepul izohli lugʻat ilovasi eʼlon qilindi. Uning Savodxon dasturi bazasidagi barcha soʻzlar izohini koʻrish mumkin.

2020-yil, 23-aprel — Oʻz vaqtini yuqori qadrlaydigan va samarali ishlashni istagan foydalanuvchilar uchun Savodxon tahrir oynasiga matn kiritishda soʻnggi kiritilgan soʻzdan keyin kelishi mumkin boʻlgan soʻzni taklif qilish funksiyasi qoʻshildi.

2020-yil, 2-fevral — Microsoft Word dasturi uchun maxsus ilova eʼlon qilindi. Uni oʻz kompyuteriga oʻrnatib, foydalanuvchi Word dasturining ichida turib Savodxon dasturi xizmatlaridan foydalana oladi.

2019-yil, 3-may — Oʻzbek tilidagi soʻzlar imlosini tekshirish va izohini koʻrish imkonini beruvchi @SavodxonBot Telegram boti ishga tushirildi.

2019-yil, 4-aprel — Savodxon dasturidan foydalanish pulli qilindi. Savodxon sayti tijorat loyihasiga aylandi.

2019-yil, 15-mart — Shaxsiy lugʻat funksiyasi yangilandi.

2019-yil, 14-fevral — Koʻpchilik foydalanuvchilar fikrini hisobga olib, Savodxon sayti interfeysi toʻliq yangilandi.

2018-yil, 1-dekabr — Istalgan saytda kiritilayotgan matnni imlo xatolariga tekshirish imkonini beruvchi Chrome brauzeri ilovasi eʼlon qilindi. Keyinchalik bu ilova ishi toʻxtatildi.

2018-yil, 28-noyabr — Shaxsiy lugʻat funksiyasi yaratildi.

2018-yil, 2-noyabr — WordPress platformasida yaratilgan saytlar uchun sayt matnini lotin yozuvidan kirillga va kirill yozuvidan lotinga oʻgirib beradigan ikkita plagin eʼlon qilindi.

2018-yil, 12-oktyabr — Shu kungacha imlo.insof.uz domeni ostida ishlab kelgan imlo dasturi Savodxon dasturi va savodxon.uz domeni bilan qayta brendlandi.

2018-yil, 24-avgust — Android tizimida ishlovchi qurilmalar uchun matnni lotin va kirill yozuvlariga oʻgirib beradigan dastur eʼlon qilindi.

2018-yil, 2-iyun — MS Word va MS Excel fayllarini saytga yuklab, ulardagi imlo xatolarini tuzatish va matnni lotin/kirill yozuvlariga oʻgirish imkoniyati qoʻshildi.

2018-yil, 25-aprel — Avval faqat lotin yozuvidagi matn imlosini tekshirgan dasturga kirill yozuvidagi matn imlosini ham tekshirish imkoniyati qoʻshildi.

2017-yil, 10-fevral — WordPress platformasida yaratilgan saytdagi tahrir oynasi uchun imlo xatolarini tekshirish plagini yaratildi.

2017-yil, 26-oktyabr — Imlo dasturi xato deb aniqlagan soʻzlar uchun toʻgʻri soʻz variantlarini taklif qilish funksiyasi qoʻshildi.

2016-yil, 8-avgust — Shu paytgacha faqat matnni lotin va kirill yozuvlariga oʻgirish uchun xizmat qilgan dasturga matn imlosini tekshirish imkoniyati qoʻshildi. Dastur toʻlaqonli imlo dasturiga aylandi.

2016-yil, 8-aprel — Lotin yozuvida yaratilgan istalgan sayt matnini kirill yozuviga oʻgirib koʻrish imkoni beruvchi Chrome brauzeri ilovasi yaratildi.

2014-yil, 1-noyabr — Imlo dasturining Android qurilmalar uchun ilovasi eʼlon qilindi.

2014-yil, 2-oktyabr — Imlo dasturi oʻz ishini boshladi.